ഗ്രൂപ്പ് എയിലെ മൂന്നാം മത്സരത്തിൽ ബംഗ്ലാദേശിനെ 48-25ന് തോൽപ്പിച്ച് നിലവിലെ ഏഷ്യൻ ഗെയിംസ് ചാമ്പ്യന്മാരായ ഇന്ത്യയുടെ കബഡി ടീം സെമിഫൈനലിൽ. ഇതോടെ ഇന്ത്യ മെഡൽ ഉറപ്പിച്ചു.
മത്സരത്തിന്റെ തുടക്കം മുതൽ വ്യക്തമായ ആധിപത്യം പുലർത്തിയ ഇന്ത്യ ആദ്യ പകുതിയിൽ തന്നെ രണ്ട് തവണ ബംഗ്ലാദേശിനെ ഓൾഔട്ടാക്കി. ആദ്യ പകുതിയിൽ 18 ഔട്ട് പോയിന്റുകളും ഏഴ് ബോണസ് പോയിന്റുകളും നേടി. 29-9 ന്റെ ലീഡോടെയാണ് ഇന്ത്യ ഇടവേളയ്ക്ക് പിരിഞ്ഞത്.
രണ്ടാം പകുതിയിൽ ബംഗ്ലാദേശ് എട്ട് ഔട്ട് പോയിന്റുകളും എട്ട് ബോണസ് പോയിന്റുകളും നേടി. ഇന്ത്യ 19 പോയിന്റുകൾ കൂടി സ്വന്തമാക്കി. ഇതിനിടെ ഒരു ഓൾഔട്ടും നേടി ഇന്ത്യ വിജയം ഉറപ്പിച്ചു.
ഇതോടെ ഗ്രൂപ്പ് എയിൽ ഇന്ത്യയ്ക്ക് തുടർച്ചയായ മൂന്നാം ജയം ലഭിച്ചു. നേരത്തെ ജപ്പാനെയും ദക്ഷിണ കൊറിയയെയും ഇന്ത്യ പരാജയപ്പെടുത്തിയിരുന്നു.
ഗ്രൂപ്പ് ഘട്ടത്തിലെ ഇന്ത്യയുടെ അവസാന മത്സരം വ്യാഴാഴ്ച ചൈനീസ് തായ്പേയിക്കെതിരെയാണ്. രണ്ട് ഗ്രൂപ്പുകളിലായി 10 ടീമുകളാണ് പുരുഷ കബഡി ടൂർണമെന്റിൽ പങ്കെടുക്കുന്നത്. ഓരോ ഗ്രൂപ്പിലെയും ആദ്യ രണ്ട് സ്ഥാനക്കാർ സെമിഫൈനലിലേക്ക് യോഗ്യത നേടും.
പുരുഷ കബഡിയിൽ ഇന്ത്യ എട്ട് തവണ ഏഷ്യൻ ഗെയിംസ് സ്വർണം നേടിയിട്ടുണ്ട്. 2018ലെ ജക്കാർത്ത ഏഷ്യൻ ഗെയിംസിൽ ഇറാൻ സ്വർണം നേടിയതൊഴിച്ചാൽ, കബഡി ഏഷ്യൻ ഗെയിംസിൽ ഉൾപ്പെടുത്തിയ എല്ലാ പതിപ്പുകളിലും ഇന്ത്യയാണ് ചാമ്പ്യന്മാരായത്.
content highlights:asian games kabaddi india beats bangladesh enters semifinals medal assured